У Польшчы 25-гадоваму салдату выстаўленыя абвінавачанні ў спробе забойства, пагрозах і перавышэнні паўнамоцтваў. Здарэнне адбылося паблізу мяжы з Беларуссю, піша РАР са спасылкай на мясцовую пракуратуру.
Салдат, які знаходзіўся ў стане алкагольнага ап’янення, самавольна пакінуў лагер у мястэчку Мельнік са зброяй і адкрыў страляніну па цывільным аўтамабілі, у якім знаходзіліся два чалавекі — мужчына і яго няпоўнагадовая дачка. На шчасце, ніхто з іх не пацярпеў. Злачынца быў затрыманы ў лесе, недалёка ад месца здарэння. Алкагольнае ап’яненне склала каля двух праміле.
Паводле інфармацыі следства, салдат спачатку страляў у паветра, а потым скіраваў зброю на пасажыраў аўтамабіля. Аўтамабіль атрымаў пашкоджанні ад некалькіх стрэлаў, адзін з якіх трапіў у пустое пасажырскае сядзенне. Усяго было зроблена не менш за 65 стрэлаў з табельнага карабіна Grot.
Салдат патлумачыў свае дзеянні стрэсам ад службы і сцвярджаў, што не памятае ўсіх абставінаў здарэння. Ён заявіў, што выпіў, каб знізіць напружанне, і нібыта хацеў толькі напалохаць пацярпелых. Тым не менш яму пагражае крымінальная адказнасць аж да пажыццёвага зняволення.
Міністр абароны Польшчы Уладзіслаў Касіняк-Камыш асудзіў тое, што адбылося, паабяцаўшы, што салдат панясе крымінальнае пакаранне і будзе неадкладна звольнены з узброеных сіл.
«Для такіх бандыцкіх паводзінаў не можа быць ніякага апраўдання», — падкрэсліў міністр.
Пацярпелыя знаходзяцца пад пастаянным наглядам псіхолагаў. Вайсковае кіраўніцтва таксама правяло сустрэчы з мясцовымі ўладамі і адміністрацыяй школ, каб запэўніць іх у тым, што такіх інцыдэнтаў больш не будзе.
Кіраўніцтва ўзброеных сіл Польшчы назвала тое, што здарылася, «недапушчальным» і выказала надзею, што гэты выпадак не падарве даверу да польскага войска. Інцыдэнт стаў падставай для перагляду шэрагу працэдур у рамках місіі на мяжы.