Беларускія прамысловыя вытворцы страчваюць пазіцыі на расійскім рынку. Пра гэта заявіў Аляксандр Лукашэнка 9 красавіка на нарадзе па сітуацыі ў прамысловасці. «Мне дакладваюць, што сёння айчынная прадукцыя саступае аналагам як па цане, так і па якасці. Па цане яшчэ вытлумачальна. Але чаму па якасці?» — задаўся пытаннем палітык. Ён запатрабаваў ад чыноўнікаў заняцца дыверсіфікацыяй экспарту тавараў і актыўней выкарыстоўваць новыя тэхналогіі ў вытворчасці.
Прамысловая вытворчасць у Беларусі расце, адзначыў Аляксандр Лукашэнка, але трэба глядзець на перспектыву. Паводле палітыка, назіраецца значнае павелічэнне выпуску электронікі, легкавых і грузавых аўтамабіляў, камбайнаў. Прадпрыемствы «Планар», «Інтэграл» і «БелОМА» цалкам сфармавалі партфель экспартных замоваў на гэты год і часткова на 2025-ы.
«Але што з іншымі прамысловымі гігантамі? Чаму скараціліся аб’ёмы выпуску лядоўняў, трактароў, пагрузчыкаў, рухавікоў? Больш чым на чвэрць прасеў „Бабруйскаграмаш“. Толькі на 12% у 2023 годзе быў загружаны Мінскі падшыпнікавы завод», — заўважыў Аляксандр Лукашэнка.
У палітыка таксама ўзніклі пытанні што да станкабудавання. «А сёння якая сітуацыя тут? Дзе выкарыстанне сучасных тэхналогій, такіх як штучны інтэлект, рабатызацыя? — задаўся пытаннямі Аляксандр Лукашэнка. — А менавіта яны забяспечваюць высокую дакладнасць і прадукцыйнасць у апрацоўцы матэрыялаў, эканомію рэсурсаў, зніжэнне выдаткаў і якасць прадукцыі. Усяго гэтага няма. Але што самае сумнае, няма бачання перспектывы. Таму я чакаю ад вас канкрэтных прапановаў, як будзем выпраўляць сітуацыю».
Лукашэнка запатрабаваў ад прамыслоўцаў «закасаць рукавы і працаваць на расійскім рынку». Нягледзячы на тое, што больш за 90% прадукцыі ідзе на рынак Расіі, беларускія вытворцы страчваюць там пазіцыі па традыцыйных таварах, якія заўсёды карысталіся попытам за свае якасць і надзейнасць.
«Мне дакладваюць, што сёння айчынная прадукцыя саступае аналагам як па цане, так і па якасці. Па цане яшчэ вытлумачальна. Але чаму па якасці? Экспарт беларускіх трактароў у 2023 годзе скараціўся на 18%. Доля нашых трактароў у расійскім імпарце знізілася да мінімальных за апошняе дзесяцігоддзе 10,5%, грузавых аўтамабіляў — да 6%», — сказаў Аляксандр Лукашэнка.
Тыя ж пагрозлівыя тэндэнцыі, паводле Лукашэнкі, складваюцца і на «Атланце». Аб’ёмы экспарту лядоўняў і маразільнікаў, яшчэ ўчора запатрабаваных, скараціліся амаль у два разы. «Што перашкаджае прадаваць прадукцыю?» — задаўся пытаннем Аляксандр Лукашэнка.
Ён таксама заявіў, што трэба праводзіць дыверсіфікацыю экспарту прамысловых тавараў. «Усё, што патрабуецца ад мяне для гэтага, прымаецца неадкладна. Створаныя неабходныя ўмовы, і вам трэба як мага актыўней выкарыстоўваць меры фінансавай падтрымкі беларускага экспарту, — сказаў Аляксандр Лукашэнка. — Чаму пасля ўсіх праведзеных перамоваў на найвышэйшым узроўні мы не працуем з Экватарыяльнай Гвінеяй? Відавочна ж, трэба ісці далей, пашыраць супрацоўніцтва. І разумець, што нашая стратэгічная задача — стварэнне сумесных зборачных вытворчасцяў беларускай тэхнікі ў апорных краінах».
Палітык таксама адзначыў, што трэба ўкараняць у прамысловасць новыя тэхналогіі.
«Так, маем складаную лагістыку і рост кошту імпартнай сыравіны. Разбурэнне кааперацыйных сувязяў з заходнімі пастаўшчыкамі прывяло да неабходнасці пошуку альтэрнатыўных партнёраў альбо наладжвання ўласнай вытворчасці камплектавальнікаў. У тым ліку паскоранай распрацоўкі і ўкаранення новых тэхнічных рашэнняў. Што рабіць, увогуле, зразумела. Чаму тармозім? Чаму не робім?» — задаўся пытаннем Аляксандр Лукашэнка.
Нагадаем, па выніках студзеня-лютага гэтага года ключавым драйверам росту стала прамысловасць. «Забяспечыла каля паловы ўсяго прыросту ВУП. Аб’ём выпуску прамысловай прадукцыі вырас на 7,1% гадавых за студзень-люты пасля 5,4% гадавых за студзень», — адзначалі раней эксперты ЕАБР.
Чытайце таксама
