Калі паглядзець голым вокам, то можа падацца, што маштабная хваля эміграцыі беларусаў мінімізавалася. Аднак калі прыгледзецца да сітуацыі ўважлівей, становіцца зразумела, што нашыя суграмадзяне ўсё ж працягваюць пакідаць краіну. У тым ліку таму яны пазбаўляюцца сваёй маёмасці, жылля і нават бізнесу. Сабралі свежыя і актуальныя абвесткі пра продаж кампаній праз змену краіны пражывання.
Стварэнне свайго бізнесу з нуля патрабуе шмат сіл, часу і часта таксама інвестыцый. Хутчэй за ўсё, каб з ім расстацца, патрэбныя важкія прычыны. Адна з іх — пераезд у іншую краіну. Летась мы некалькі разоў расказвалі пра тое, як беларусы перадаюць свае кампаніі ў іншыя рукі праз эміграцыю. Цяпер мы вывучылі абвесткі студзеня гэтага года пра продаж прадпрымальніцкай актыўнасці і ўбачылі, што гэты працэс працягваецца.
Швейны бізнес у Брэсце з брэндам
«Прадаецца швейны бізнес у Брэсце ў сувязі з пераездам у іншую краіну», — гаворыцца ў абвестцы. У кампаніі ёсць уласны дызайнерскі брэнд. Бізнес працуе з 2021 года і ўключае поўны цыкл вытворчасці жаночага адзення.
Асноўная пляцоўка — гэта 100 м² у цэнтры горада, дзе размешчаныя швейны і раскройный цэхі, а таксама офіс-склад. Дамова арэнды заключаная да 2027 года. У памяшканні нядаўна зрабілі рамонт.
Уладальніца падкрэслівае, што ў кампаніі наладжаныя пастаўкі. «Гатовыя вырабы прадаюцца на прасторах усяго СНД», а рознічныя продажы ажыццяўляюцца праз інтэрнэт, маркетплэйс Wildberries і гандлёвыя сеткі. У камплекце з бізнесам ідуць акаўнты ў Instagram, оптавы і рознічны сайты.
Кошт прадпрыемства дамоўны.
Крама адзення
У цэнтры гэтага ж горада ў сувязі са зменай краіны пражывання выставілі на продаж краму жаночага і дзіцячага адзення. Аб’ект працуе 15 гадоў. Ён займае 40,4 м², абсталяваны кандыцыянерам, ацяпленнем і прасторнымі вітрыннымі вокнамі.
У кошт уваходзіць усё неабходнае для працягу працы: наладжаныя кантакты з пастаўшчыкамі, актыўны Instagram-акаўнт, лаяльная кліенцкая база з 2000 пастаянных пакупнікоў, а таксама таварныя запасы, мэбля і абсталяванне.
Кошт дамоўны.
Барбершоп у Мінску
Тую ж прычыну агучылі ў абвестцы пра продаж барбершопа ў сталіцы — пераезд уласніка ў іншую краіну. Салон працуе з 2018 года. Знаходзіцца ў памяшканні з дзяржаўнай арэндай (гэта значыць, што памяшканнем валодае дзяржструктура).
У кошт уключаныя крэслы і мыйкі, мэбля для зоны адміністратара і адпачынку, а таксама пакоі адпачынку супрацоўнікаў. Ёсць відэаназіранне і кандыцыянеры, вітрына для касметыкі, шафа для ручнікоў.
Кошт — 45 000 рублёў.
Мясная крама ў Мінску
«У сувязі з пераездам на ПМЖ у іншую краіну» ў сталіцы шукаюць новага гаспадара для мясной крамы. Гэта гатовы бізнес на першым паверсе адной са шматпавярховак ЖК Vogue у Цэнтральным раёне Мінска. Плошча самой крамы і падсобнага памяшкання — 29 «квадратаў».
«Раён з жыхарамі, у якіх ёсць грошы і якія любяць есці якасную прадукцыю», — адзначае прадавец. У кошт бізнесу ўваходзяць вітрыны, халадзільнае і маразільнае абсталяванне, інвентар, база пастаўшчыкоў.
Уладальнік гатовы пракансультаваць і суправаджаць на пачатковым этапе пасля перадачы крамы ў новыя рукі.
Кошт — 50 000 рублёў.
Салон прыгажосці і танцавальная студыя
Без агучвання цаны ў Брэсце прапануюць спартыўную студыю для заняткаў танцамі.
У Магілёве прадаецца салон апаратнай касметалогіі і эпіляцыі. Ён працуе ў арандаваным памяшканні. Па сутнасці, цана фармуецца згодна з коштам абсталявання. Гэта лазер, якім карысталіся каля 1,5−2 гадоў, вакуумна-ролікавыя апараты — для касметычных працэдур і для карэкцыі фігуры, а таксама кушэтка і іншая неабходная мэбля.
Кошт — 51 500 рублёў.
